हावा पनि छुटि्टएर बहन थाले रे अचेल
कतै मलाई स्पर्ष गरेको हावाले तिम्लाई नछोओस
हेर न खण्ड खण्डमा विभाजित छ आकाश
तिम्रो आकाशमा घाम लाग्दा
मेरो आकाश अँध्यारो हुन्छ
यस्तै छ जमिन पनि हिजो आज त
वर्षाले ओसिएको छ तिम्रो जमिन
म खडेरीले पटपट फुटेको जमिन नियाल्दैछु
विश्वासै त हो के थाहा
फाटेको जमिनबाट पनि पलाउला की टुसा प्रेमको
तर अहँ म सचेत छु
हाम्रो भुगोल अब एउटै छैन
भनेनी विभाजित छ
खण्ड खण्डमा
आकाश
जमिन
घाम अनि वर्षा
म आफैपनि
म आफ्नै छायाँ अचेल अर्को भुगोलमा देख्छु
कतै झुक्किएर म तिम्रो देशमा नपसुँ
मैले पाइला पाइलामा सिमा रेखा कोरेको छु
अब हामी एउटै भुगोल भित्र छैनौँ
हाम्रा लागि यो भुगोल एउटै छैन
